మృణాల్ ఠాకూర్, హుమా ఖురేషి ప్రధాన పాత్రల్లో నటించిన క్రేజీ సస్పెన్స్ థ్రిల్లర్ ‘పూజా మేరీ జాన్’. నవజ్యోతి గులాటీ, విషాషా అరవింద్ సంయుక్తంగా దర్శకత్వం వహించిన ఈ సినిమాను ప్రముఖ నిర్మాణ సంస్థ మాడాక్ ఫిల్మ్స్ బ్యానర్ పై తెరకెక్కించారు. నిజానికి ఈ మూవీ ఇప్పటిది కాదు. దాదాపు నాలుగేళ్ల కిందటే షూటింగ్ పూర్తి చేసుకుంది. వివిధ కారణాల వల్ల థియేట్రికల్ రిలీజ్ కు నోచుకోలేదు. ఇప్పుడు కూడా థియేటర్లలో రిలీజ్ అవ్వడం లేదు. నాలుగేళ్ల సుదీర్ఘ విరామం తర్వాత, ఈ చిత్రాన్ని నేరుగా ఓటీటీలోకి స్ట్రీమింగ్ కు తీసుకొస్తున్నారు.
ఈ మేరకు తాజాగా మేకర్స్ అధికారిక ప్రకటనతో పాటు ట్రైలర్ ను కూడా విడుదల చేశారు. జీ5 వేదికగా అక్టోబర్ 2 నుంచి మృణాల్ సినిమా స్ట్రీమింగ్ కాబోతోంది. “కొన్ని కథలు మీరు చూసే విషయాలనే అనుమానించేలా చేస్తాయి..మరికొన్ని మీరు నమ్మే విషయాలను ప్రశ్నించేలా చేస్తాయి. కానీ ఈ కథ మాత్రం వాటి మధ్యలో ఉన్న ప్రతి దానినీ ప్రశ్నిస్తుంది.” అంటూ మేకర్స్ ఇచ్చిన ఆసక్తికరమైన క్యాప్షన్ సినిమాపై అంచనాలను కూసింత పెంచింది. మృణాల్, హుమా కలిసి ఎలాంటి సస్పెన్స్ అందిస్తారో చూడాలి..!!
