యువరాణిగా వెండితెరపై కనిపించబోతున్నది కేథరిన్‌ ట్రెసా. అపర పరాక్రమాలతో ఆకట్టుకునేందుకు సిద్ధమవుతోంది. కల్యాణ్‌రామ్‌ కథానాయకుడిగా ‘తుగ్లక్‌’ పేరుతో ఫాంటసీ యాక్షన్‌ ఎంటర్‌టైనర్‌ చిత్రం తెరకెక్కుతోంది. పదమూడో శతాబ్దంతో పాటు నేటి కాలాన్ని ఆవిష్కరిస్తూ రూపొందుతున్న ఈ చిత్రంలో కల్యాణ్‌రామ్‌ ద్విపాత్రాభినయం చేయబోతున్నారు. తన పాలన విధానాలతో అపఖ్యాతి పొందిన రాజుగా, నేటి యువకుడిగా భిన్న పార్శాలతో ఆయన పాత్రలు సాగనున్నట్లు సమాచారం.
ఈ సినిమాలో కేథరిన్‌ ఓ కథానాయికగా నటిస్తున్నట్లు తెలిసింది. యువరాణిగా ఆమె ఈ సినిమాలో కనిపించబోతున్నట్లు సమాచారం. నటనాపరంగా వైవిధ్యతను కనబరిచే అవకాశం ఉన్న క్యారెక్టర్‌ కావడంతో కేథరీన్‌ ఈ సినిమాలో నటించడానికి అంగీకరించినట్లు చెబుతున్నారు. ఈ సినిమాతో వశిష్ట మల్లిడి దర్శకుడిగా పరిచయమవుతున్నారు. త్వరలో ఫస్ట్‌లుక్‌ను విడుదలచేసేందుకు చిత్రబృందం సన్నాహాలు చేస్తోంది.
