RX 100′ చిత్రంతో యువతలో మంచి క్రేజ్ సంపాదించుకున్న హీరో కార్తికేయ గుమ్మకొండ, రెండేళ్ల విరామం తర్వాత మళ్లీ ప్రేక్షకుల ముందుకు రాబోతున్నాడు. ఈసారి కేవలం హీరోగా మాత్రమే కాకుండా, రచయితగా, దర్శకుడిగా కొత్త అవతారం ఎత్తాడు. స్వీయ దర్శకత్వంలో నటిస్తున్న చిత్రానికి ‘కమ్బ్యాక్’ అనే ఆసక్తికర టైటిల్ ఖరారు చేశారు. ఈ చిత్రాన్ని కార్తికేయ క్రియేటివ్ వర్క్స్ పతాకంపై కార్తికేయ అర్ధాంగి లోహితా రెడ్డి నిర్మిస్తుండటం విశేషం.
తన పుట్టినరోజు సందర్భంగా కార్తికేయ ఈ సినిమా టైటిల్ను, ఫస్ట్ గ్లింప్స్ను విడుదల చేశాడు. “బాక్సింగ్ ప్రపంచంలో అతని పేరు వినిపించి మూడేళ్లు అవుతోంది” అనే వాయిస్ ఓవర్తో మొదలైన ఈ గ్లింప్స్ సినిమాపై అంచనాలను పెంచుతోంది. మూడేళ్లుగా కనిపించకుండా పోయిన ఓ బాక్సర్ తిరిగి వస్తే ఎలా ఉంటుందనే కథాంశంతో ఈ చిత్రం తెరకెక్కుతున్నట్లు స్పష్టమవుతోంది. ఫిట్గా, సరికొత్త లుక్లో కార్తికేయ బాక్సింగ్ ప్రాక్టీస్ చేస్తున్న విజువల్స్ ఆకట్టుకుంటున్నాయి. విజయ్ బుల్గానిన్ అందించిన నేపథ్య సంగీతం గ్లింప్స్కు ప్రధాన ఆకర్షణగా నిలిచింది..!!
