మీరు చూసింది, విన్నది నిజమే… దేవిశ్రీప్రసాద్‌ అరగంటలో ఆరు పాటలు ఇచ్చేశాడు. ఈ మాట ఎవరో చెబితే తెలుసుకున్నది దర్శకుడు రమేశ్‌ వర్మ చెప్పిందే. సినిమా గురించి మాట్లాడుతూ సంగీత దర్శకుడు ప్రస్తావన వచ్చినప్పుడు ఈ విషయం చెప్పాడు. సినిమా కథ వినగానే ఇన్‌స్పైర్‌ అయ్యి… 30 నిమిషాల్లో ఆరు పాటలు ఇచ్చాడట దేవిశ్రీప్రసాద్‌. అయితే సినిమాలో ఐదు పాటలే అవసరముంది ఒక పాటను పక్కన పెట్టారట. ఫిబ్రవరి 11న ‘ఖిలాడీ’ సినిమా విడుదలవుతున్న సందర్భంగా చిత్రబృందం ఇంటర్వ్యూలు ఇస్తోంది. ఈ సందర్భంగా దర్శకుడు రమేశ్‌ వర్మ కూడా ఇంటర్వ్యూ ఇచ్చారు..
అందులోనే దేవిశ్రీప్రసాద్‌ గురించి, ఆయన అందించిన పాటల గురించి చర్చ వచ్చింది. మ్యూజిక్‌ సిట్టింగ్స్‌ ఎలా జరిగాయి అనేది ఆ ఇంటర్వ్యూలో చెప్పుకొచ్చారు దర్శకుడు రమేశ్‌ వర్మ. పాటల కోసం ఇద్దరం కలసి కూర్చుకున్నామని… అలా అలా మాట్లాడుకుంటూ రాత్రి 2 అయ్యిందని చెప్పాడు. ఆ సమయంలోనే సినిమా కథ చెప్పారట. రెండు గంటలకు కథ చెప్పడం ప్రారంభించి 4.30 వరకు కథ పూర్తి చేశారట. ఆ తర్వాత అరగంటలోనే మొత్తం ఆరు పాటలు ఇచ్చారని చెప్పారు రమేశ్‌ వర్మ.
