బుల్లితెరపై బాలనటులుగా అలరించిన చాలామంది పెద్దయ్యాక వెండితెరపై ప్రేక్షకులను అలరిస్తూ ఉంటారు. అలాంటి వారిలో ‘చిన్నారి పెళ్లికూతురు’ ఫేమ్ అవికా గోర్ ఒకరు. ‘ఉయ్యాల జంపాల’తో తెలుగు ప్రేక్షకులను ఆకట్టుకున్న అవికా.. ఆ తర్వాత కొన్ని సినిమాలు చేసినా అవి ఆమె కెరీర్‌ ఎదుగుదలకు ఏమాత్రం సహకరించలేదు. ‘రాజు గారి గది-3’ తర్వాత గ్యాప్ తీసుకున్న ఆమెకు ఇప్పుడు తెలుగులో అవకాశాలు ఊపందుకున్నాయి.
ఈ నేపథ్యంలోనే అక్కినేని నాగచైతన్య సరసన నటించేందుకు ఓకే చెప్పిందట అవికా గోర్. విక్రమ్‌ కుమార్‌ – నాగచైతన్య కాంబినేషన్‌లో తెరకెక్కుతున్న ‘థ్యాంక్యూ’ సినిమా షూటింగ్ ఇటీవలే మొదలైంది. ఇందులో ఇద్దరు హీరోయిన్లకు అవకాశం ఉండగా… అందులో ఓ నాయికగా అవికా గోర్‌ను తీసుకున్నారట. విక్రమ్‌ కుమార్‌- నాగచైతన్య సినిమా అనేసరికి అవిక వెంటనే ఓకే చెప్పేసిందట. త్వరలోనే ఆమె యూనిట్‌తో కలవనుందట.
