హీరోయిన్ సాయి పల్లవి అనగానే అందరికీ గుర్తుకొచ్చేది ఆమె అద్భుతమైన నటన. ప్రస్తుత హీరోయిన్లందరూ తమ గ్లామర్ ను నమ్ముకుని సినిమాలు చేస్తుంటే… సాయి పల్లవి మాత్రం తన టాలెంట్ ను నమ్ముకుని వరుస సినిమాలు చేస్తోంది. ఆమె నటనకు ఎంతో మంది సినీ అభిమానులు ఫిదా అయిపోయారు. ఇంటిల్లిపాది అభిమానించే నటి ఎవరని అడిగితే… చాలా మంది సాయి పల్లవి పేరే చెపుతారు. అంతలా ఆమె తన నటనతో ప్రేక్షకుల హృదయాలను దోచుకుంది.
తాజాగా నానితో కలిసి నటించిన ‘శ్యామ్ సింగరాయ్’ చిత్రంలో మరో అద్భుతమైన పాత్రలో ఆమె మెరిసింది. రానా దగ్గుబాటితో కలిసి ఆమె నటించిన ‘విరాటపర్వం’ సినిమా విడుదలకు సిద్ధంగా ఉంది. మరోవైపు, సాయి పల్లవి గురించి ఓ వార్త సినీ పరిశ్రమలో వైరల్ అవుతోంది. ఆమె పెళ్లి చేసుకోబోతోందని… పెళ్లి ఏర్పాట్లలో ఆమె కుటుంబ సభ్యులు బిజీగా ఉన్నారనేది ఆ వార్త సారాంశం. అందుకు తగ్గట్టుగానే గత కొంత కాలంగా ఆమె కొత్తగా ఏ చిత్రాన్ని అంగీకరించలేదు.
పెళ్లి కోసమే ఆమె కొత్త చిత్రాలకు సైన్ చేయలేదనే ప్రచారం జరుగుతోంది. అంతేకాదు… ఇటీవలి కాలంలో ఆమె బయట ఎక్కడా కనిపించలేదు. దీంతో ఈ ప్రచారానికి మరింత బలం చేకూరినట్టయింది. అయితే, ఈ వార్తలపై సాయి పల్లవి ఇప్పటి వరకు స్పందించలేదు. కానీ, ఆమె సన్నిహితులు మాత్రం స్పందించారు. సాయి పల్లవి పెళ్లి చేసుకోబోతోందనే వార్తల్లో నిజం లేదని వారు చెప్పారు. మంచి క్యారెక్టర్ల కోసం ఆమె ఎదురు చూస్తోందని… మంచి పాత్రలు దొరికితే ఆమె కొత్త సినిమాలో నటిస్తుందని తెలిపారు. ఏదేమైనప్పటికీ ఈ విషయంలో పూర్తి క్లారిటీ రావాల్సి ఉంది.
