ఐకాన్ స్టార్ అల్లు అర్జున్, రాక్‌ స్టార్ దేవిశ్రీ ప్రసాద్‌ కాంబినేషన్ లో వచ్చిన సినిమాల‌న్నీ మ్యూజికల్ హిట్ గా నిలిచాయి. ‘ఆర్య’ నుంచి ‘దువ్వాడ జగన్నాథం’ వరకు వీరి కాంబినేషన్ లో వచ్చిన ప్రతి ఆల్బమ్ ఆకట్టుకుంది. అందుకే వీరి కాంబినేషన్ పై ఆడియన్స్ లో మంచి క్రేజ్ ఉంది. ప్రస్తుతం బన్నీ హీరోగా సుకుమార్ దర్శకత్వంలో తెరకెక్కుతోన్న పాన్ ఇండియా మూవీ ‘పుష్ప’కి కూడా డీఎస్పీనే సంగీతం అందిస్తున్నాడు. ఈ ఆల్బమ్ కోసం ఫ్యాన్స్ ఆసక్తిగా ఎదురుచూస్తున్నారు. బన్నీ, డీఎస్పీ మంచి స్నేహితులు. తొలి సినిమా నుండి ఎంతో ఫ్రెండ్లీగా ఉంటూ వ‌స్తున్నారు వీరిద్ద‌రు.
తన సన్నిహితులకు, స్నేహితులకు స్పెషల్ గిఫ్ట్ ఇచ్చి సర్ ప్రైజ్ చేయడం బన్నీకి అలవాటు. తాజాగా అలాంటి స్వీట్ సర్ ప్రైజ్ ను డీఎస్పీకి ఇచ్చాడు బన్నీ. బన్నీ ఇచ్చిన స్పెషల్ గిఫ్ట్ ను చూసి తెగ సంతోషించిన డీఎస్పీ.. సోషల్ మీడియా ద్వారా తన ఆనందాన్ని తెలియ‌జేస్తూ ఐకాన్ స్టార్ కి థాంక్స్ చెప్పాడు. “ఐకాన్ స్టార్ అల్లు అర్జున్ నుంచి సర్‌ప్రైజ్‌ ‘రాక్‌స్టార్‌’ గిఫ్ట్. థాంక్యూ సో మచ్ మై డియరెస్ట్ బ్రదర్ బన్నీ బాయ్. లవ్లీ గిఫ్ట్. అస్సలు ఊహించలేదు. నువ్వు చాలా స్వీట్’అంటూ డీఎస్పీ ఆ గిఫ్ట్ కు సంబంధించిన వీడియోను సోషల్ మీడియాలో పోస్ట్ చేశాడు.
