బాలీవుడ్ హీరోయిన్‌ను టాలీవుడ్‌ సినిమాలో నటింపజేయాలి అంటే అంత ఈజీగా కాదు. భగీరద ప్రయత్నం లాగా… చాలా కష్టపడాల్సి ఉంటుంది. అందులో ఫుల్‌ మాస్ మసాలా సినిమాలో బాలీవుడ్ హీరోయిన్‌ను నటింపజేయాలి అంటే ఇంకా కష్టం. అందులోనూ అక్కడి స్టార్‌ హీరోయిన్‌తో సినిమా అంటే ఇంకా ఇంకా కష్టం. అయితే ఎన్టీఆర్‌ – ప్రశాంత్‌ నీల్‌ కలసి ఈ పని చేయబోతున్నారా? అవుననే అంటున్నాయి టాలీవుడ్‌ వర్గాలు. ప్రశాంత్‌ నీల్‌ దర్శకత్వంలో ఎన్టీఆర్‌ ఓ సినిమా చేయనున్న విషయం తెలిసిందే.
చాలా రోజుల క్రితమే రూమర్‌గా మొదలైన ఈ సినిమా, ఆ తర్వాత కన్‌ఫామ్‌ అయ్యింది. అయితే అటు ప్రశాంత్‌ నీల్‌, ఇటు తారక్‌ వరుస సినిమాలతో బిజీగా ఉండటంతో ఈ సినిమా ఆలస్యమవుతూ వచ్చింది. ఇప్పుడు సినిమా గురించి మళ్లీ ఇప్పుడు చర్చ మొదలైంది. ‘సలార్‌’ తర్వాత ఎన్టీఆర్‌తో సినిమా చేస్తానని ప్రశాంత్‌ నీల్‌ చెప్పేశారు. దీంతో సినిమాలో హీరోయిన్‌ ఎవరు అనే చర్చ మొదలైంది. ప్రశాంత్‌ నీల్‌ – ఎన్టీఆర్‌ కాంబినేషన్‌లో ఈ సినిమాను మైత్రీ మూవీమేకర్స్‌ రూపొందినుంది.
అంతేకాదు ఈ సినిమా పాన్‌ ఇండియా రేంజిలో ఉంటుందంటున్నారు కూడా. దీంతో ఇందులో నటీనటులు ఇతర భాషల్లోని స్టార్లే అవుతారు అని లెక్కలేస్తున్నారు. ఈ క్రమంలోనే ఈ సినిమాలో దీపికా పడుకొణె నటిస్తోందని వార్త వైరల్‌గా మారింది. దీపిక తెలుగులో నటిస్తే బాగుంటుందని అని అందరూ కోరుకుంటారు. కానీ హీరో ప్రాధాన్యమున్న సినిమాలో ఆమె నటించడం అంటే కష్టమే అని చెప్పొచ్చు. ‘ప్రాజెక్ట్‌ K’ సినిమాలో నటిస్తోంది కదా అని అంటారా? ఆ సినిమాలో ఆమె పాత్ర నేపథ్యం కొత్తగా, పెద్దగా ఉంటుందట.
