నేచురల్ స్టార్ నాని, ప్రశాంత్ తిపిర్నేని నిర్మాతలుగా శైలేష్ కొలను దర్శకత్వంలో తెరకెక్కిన హిట్ సినిమా మంచి విజయాన్ని దక్కించుకుంది. విశ్వక్‌సేన్ హీరోగా తెరకెక్కిన ఈ చిత్రంలో రుహని శర్మ, హరి తేజ, భాను చందర్, మురళి శర్మ, రవి వర్మ, బ్రహ్మాజీ నటించారు. ఈ క్రైమ్ డ్రామాకి విమర్శకుల నుంచి ప్రశంసలు కూడా వచ్చాయి. ఇక ఈ మూవీని హిందీలో కూడా రీమేక్‌ చేస్తున్నారు.
కాగా హిట్ మూవీ విడుదలైనప్పుడే దీనికి సీక్వెల్‌ని ప్రకటించారు దర్శకుడు. ఇప్పుడు ఈ సినిమాకి సీక్వెల్ ఖరారైంది. తొలి సినిమాలో నటించిన విశ్వక్‌సేన్ ఈ సీక్వెల్‌లో నటించడం లేదని తాజా సమాచారం. ఇక ఇందులో హీరోగా అడివి శేషు నటించబోతున్నట్లు తెలుస్తోంది. దీనికి సంబంధించి అతడితో సంప్రదింపులు జరపడం, ఆయన ఓకే చెప్పడం జరిగిపోయాయని తెలుస్తోంది. అంతేకాదు ఈ మూవీ మార్చిలో సెట్స్ మీదకు వెళ్లనున్నట్లు టాక్‌.
