బహుశా వెండితెర ప్రేక్షకులకు ఈ పేరు కొత్త ఏమో!? కానీ, తెలుగు & కన్నడ బుల్లితెర వీక్షకులకు సుపరిచితమే. కన్నడ సీరియళ్లతో కెరీర్ ఆరంభించిన చైత్రకు తెలుగులో ‘అష్టా చమ్మా’ తొలి సీరియల్..ఇప్పుడు ‘జీ తెలుగు’లో ప్రసారం అవుతున్న ‘రాధకు నీవేరా ప్రాణం’ సీరియల్ చేస్తున్నారు. ఇప్పుడు ఈమె గురించి ఇంత ఇంట్రడక్షన్ ఎందుకు అంటే..ఇన్నాళ్లూ బుల్లితెరపై అలరించిన చైత్ర రాయ్, ఇప్పుడు వెండితెర అవకాశాన్ని అందుకున్నారు.అవును..ఎన్టీఆర్ హీరోగా కొరటాల శివ దర్శకత్వం వహిస్తున్న సినిమాలో చైత్ర రాయ్ కీలక పాత్రలో కనిపించనున్నారు.
ఈ సినిమాలో బాలీవుడ్ స్టార్ హీరో సైఫ్ అలీ ఖాన్ నటిస్తున్న సంగతి తెలిసిందే. ఆయనకు భార్య పాత్ర పోషించే అవకాశం చైత్ర రాయ్ అందుకున్నారు. ఆల్రెడీ చిత్రీకరణలో పాల్గొన్నారు కూడా! ”ఎన్టీఆర్, సైఫ్ అలీ ఖాన్..ఇద్దరూ పెద్ద స్టార్లు! వాళ్ళను సిల్వర్ స్క్రీన్ మీద చూడటమే కానీ నేరుగా కలిసింది లేదు. తొలిసారి వాళ్ళను చూడగానే చాలా ఎగ్జైట్ అయ్యాను. ఇద్దరు గొప్ప స్టార్లతో కలిసి నటించే అవకాశం రావడం నా అదృష్టం. నాకు ఇదొక వరం. నేను ఇంకా మేఘాల్లో తేలుతున్నాను” అని ఓ ప్రముఖ పత్రికకు ఇచ్చిన ఇంటర్వ్యూలో చైత్ర రాయ్ పేర్కొన్నారు. సైఫ్ భార్య పాత్రలో నటిస్తున్న విషయాన్ని కన్ఫర్మ్ చేశారు..!!
