క్యాస్టింగ్‌ కౌచ్‌ వల్ల ఎన్నో బాధలు పడ్డానంటూ ఆ మధ్య ఓ ఇంటర్వ్యూలో తన అనుభవాలను వెల్లడించింది అలనాటి హీరోయిన్‌ ఇషా కొప్పికర్‌. క్యాస్టింగ్‌ కౌచ్‌ వల్ల తనకు సినిమా అవకాశం కూడా చేజారిపోయిందని చెప్పుకొచ్చింది. తాజాగా బాలీవుడ్‌ హంగామాకు ఇచ్చిన ఇంటర్వ్యూలో ఆమె మాట్లాడుతూ దీనికి సంబంధించిన మరిన్ని విషయాలు వెల్లడించింది… ‘యాక్టర్స్‌గా ఎలా కనిపిస్తున్నాము? ఎలా నటిస్తున్నామనేదే ముఖ్యమనుకున్నాను. కానీ కొందరు హీరోల కంట్లో కూడా ఉంటామని తర్వాత తెలిసింది. ఆ రోజు జరిగిన సంఘటనతో నా హృదయం ముక్కలైంది.
అందరికీ వారికంటూ కొన్ని ప్రాధాన్యతలుంటాయి. అలా నాకు నా వర్క్‌ కంటే జీవితమే ముఖ్యమైనది. అద్దంలో నన్ను నేను చూసుకున్నప్పుడు తలెత్తుకునేలా ఉండాలి’ అని పేర్కొంది..కాగా గతంలో ఓ ఇంటర్వ్యూలో ఇషా మాట్లాడుతూ.. ‘ఆ ఓ నిర్మాత ఫోన్‌ చేసి ఓ హీరో రాసుకున్న లిస్టులో మీరు కూడా ఉన్నారని చెప్పాడు. నాకర్థం కాక హీరోకు ఫోన్‌ చేస్తే అతడు ఒంటరిగా రమ్మన్నాడు. నా స్టాఫ్‌ ఎవరూ కూడా వెంట రావద్దని మరీ మరీ చెప్పడంతో విషయం అర్థమైంది. అప్పుడు నిర్మాతను పిలిచి నా అందం, పనితనం వల్లే ఇక్కడిదాకా వచ్చాను, అలాంటిది ఇప్పుడు ఓ అవకాశం కోసం దిగజారతానని ఎలా అనుకున్నారని కడిగిపారేశాను. దీంతో అతడు నన్ను సినిమా నుంచి తప్పించాడు’ అని చెప్పుకొచ్చింది.
