మొన్నటివరకు కుర్రహీరోల సరసన నటించింది. ఇప్పటికీ ఆమె కుర్రహీరోల హాట్ ఫేవరెట్. కానీ శృతిహాసన్ మాత్రం ఎందుకో సీనియర్ హీరోల సినిమాలకే మొగ్గుచూపుతోంది. మొన్నటివరకు రవితేజ, పవన్ కల్యాణ్ సినిమాల్లో నటించిన ఈ బ్యూటీ, ఇప్పుడు ఏకంగా చిరంజీవి, బాలకృష్ణ సినిమాలకు కూడా కాల్షీట్లు ఇస్తోంది. చిరంజీవి, బాబి దర్శకత్వంలో వస్తున్న సినిమా కోసం శృతిహాసన్ ను హీరోయిన్ గా తీసుకున్నారు. మైత్రీ మూవీ మేకర్స్ బ్యానర్ పై వస్తున్న ఈ సినిమాలో శృతిహాసన్ ను తీసుకున్న విషయాన్ని నిన్న అధికారికంగా ప్రకటించారు.
ఈ సందర్భంగా చిరంజీవి-శృతిహాసన్ కలిసి దిగిన ఫొటోను కూడా షేర్ చేశారు. చిరంజీవి సినిమా కంటే ముందు బాలయ్య సినిమాలో నటించడానికి ఒప్పుకుంది శృతిహాసన్. గోపీచంద్ మలినేని దర్శకత్వంలో ఓ సినిమా చేస్తున్నాడు బాలయ్య. ఇందులో హీరోయిన్ గా శృతిహాసన్ ఎంపికైంది. ఆల్రెడీ ఓ షెడ్యూల్ లో జాయిన్ అయింది కూడా..ఇలా టాలీవుడ్ లో చిరంజీవి, బాలకృష్ణ లాంటి హీరోలతో సినిమాలు చేస్తూ, తన కెరీర్ స్పాన్ ను తగ్గించుకుంటోంది శృతిహాసన్. రాబోయే రోజుల్లో వెంకటేష్, నాగార్జున సరసన నటించినా ఆశ్చర్యపోనక్కర్లేదు.
