మెగాస్టార్ చిరంజీవి తెలుగు సినీ పరిశ్రమకు వచ్చి హీరోగా ఎదిగి మెగాస్టార్ అయిపోయారు. కానీ.. ఈ ప్రస్థానానికి ముందు ఆయన నలుగురు తోబుట్టువులకు అన్న. కుటుంబానికి తండ్రి తర్వాత తండ్రి స్థానం తీసుకునేది ఆ ఇంట్లోని పిల్లల్లోని పెద్దవాళ్లు. చిరంజీవి ఆ స్థానానికి పరిపూర్ణత తీసుకొచ్చారు. అయిదుగురు పిల్లల్లో పెద్ద వాడైన చిరంజీవి వేసిన అడుగు తర్వాత ఆ నలుగురికి మార్గదర్శకంగా నిలిచింది. తాను ప్రయోజకుడయ్యాక మిగిలిన తోబుట్టువులను కూడా ప్రయోజకులయ్యే మార్గాన్ని చూపించారు. చిరంజీవి సినిమాల్లో రాణించి సుస్థిర స్థానం ఏర్పరచుకున్న తర్వాత నాగబాబును నిర్మాతగా, నటుడిగా రాణించేందుకు అవకాశం కల్పించారు.
నాగబాబుకు అంజనా ప్రొడక్షన్స్ బ్యానర్ పై సినిమాలు నిర్మించే బాధ్యతలను అప్పగించారు. అక్కడి నుంచి నాగబాబు సినీ పరిశ్రమలో ఎదిగారు. వ్యక్తిగతంగా లా చదువు చదువుకున్న అన్న అడుగుజాడల్లోనే నడిచారు. ఇక పవన్ కల్యాణ్ సంగతి ప్రత్యేకించి చెప్పే అవసరం లేదు. తమ్ముడి బాధ్యతను చిన్నప్పటి నుంచే తీసుకుని పవన్ కు ఇష్టమైన మార్షల్ ఆర్ట్స్ లో తర్ఫీదును ఇప్పించారు. సినీ ఇండస్ట్రీకి హీరోగా పరిచయం చేశారు. అన్న అడుగుజాడల్లో హీరోగా వచ్చి ఆ అన్న అభిమానుల అండదండలతో పవన్ ఉన్నత శిఖరాలకు ఎదిగిపోయాడు. పవన్ ఈరోజు ఈ స్థాయిలో ఉన్నా అది చిరంజీవి అన్నగా నిర్వర్తించిన బాధ్యత అని చెప్పాలి. తన ఇద్దరు చెల్లెళ్ల బాధ్యత కూడా తీసుకున్నారు చిరంజీవి. వారిద్దరి కోసం రౌడి అల్లుడు, అన్నయ్య సినిమాలు తీశారు. సాయిరాం ఆర్ట్స్ బ్యానర్ పై సినిమాను నిర్మించి లాభాలను పూర్తిగా వారికే ఇచ్చేశారు. చిరంజీవి హైదరాబాద్ లో స్థిరపడ్డాక వారిద్దరినీ అక్కడికే రప్పించుకుని ఇళ్లు కట్టించి అన్నగా బాద్యత నెరవేర్చారు. అంతర్జాతీయ తోబుట్టువుల దినోత్సవం సందర్భంగా చిరంజీవి కుటుంబ పెద్దగా అందరికీ ఆదర్శంగా నిలిచారనడంలో సందేహం లేదు
