టాలీవుడ్ హీరో సత్యదేవ్ ఇటీవలే బాలీవుడ్ లోకి అడుగు పెట్టాడు. ప్ర‌స్తుతం సత్యదేవ్ తీవ్రవాదం నేపథ్యంలో తెరకెక్కుతున్న “హబీబ్” అనే హిందీ సినిమాలో నటిస్తున్నాడు. ఈ సినిమా త్వ‌ర‌లో విడుదల కానుంది. ఈ సినిమాకి సంబంధించిన ప్ర‌మోష‌న్ కార్య‌క్ర‌మంలో సత్యదేవ్ పలు ఆస‌క్తిక‌ర విష‌యాలు వెల్ల‌డించాడు. హబీబ్ సినిమా షూటింగ్ సమయంలో ఎన్నో ఆటంకాలు, ప్రమాదాలు ఎదురయ్యాయని..
భయపడుతూ షూటింగ్ చేసినట్లు తెలిపాడు. గత కొంత కాలంగా ఆఫ్ఘన్ దేశాన్ని తాలిబన్లు తిరిగి దక్కించుకునేందుకు భీకరంగా పోరాటం చేస్తున్న క్రమంలో ఈ సినిమా టీం ఆ దేశానికి వెళ్లి షూటింగ్ చేయాల్సి వచ్చింది. ప్రాణాలకు ప్రమాదం అని తెలిసినా సత్యదేవ్ షూటింగ్ లో పాల్గొన్నాడు. షూటింగ్ జరుగుతున్న సమయంలో కొందరు తనకు కాల్ చేసి చంపేస్తామంటూ బెదిరించారని సత్యదేవ్ తెలిపాడు.
ఆర్మీ తరహా దుస్తులు ధరించి సత్యదేవ్ పై షూటింగ్ చేయగా అతడి వేషధారణ కారణంగా ఒక దశలో అతడిని తాలిబాన్ అని పొరపాటు పడ్డారట. స్థానిక పోలీసుల కోసం సందేహాలను నివృత్తి చేయడానికి భారత రాయబార కార్యాలయం వారి ఆధారాలను చూపించాల్సి వచ్చిందట. ఇటీవలే సత్యదేవ్ “తిమ్మ‌ర‌సు” సినిమాతో థియేటర్లలో సందడి చేసిన విషయం తెలిసిందే.
