ఇప్పుడు సుకుమార్‌తో అతను చేస్తున్న ‘పుష్ప’ కచ్చితంగా బ్లాక్‌బస్టర్ అవుతుందనే అంచనాలున్నాయి. దీని తర్వాత బన్నీ ‘ఐకాన్’ సినిమాను పట్టాలెక్కించబోతున్నాడు. ఇది ఎప్పట్నుంచో చర్చల్లో ఉన్న సినిమా. ఒక దశలో ఇది రద్దవుతుందనే ప్రచారం జరిగింది కానీ.. ఆ ప్రచారానికి తెరదించుతూ బన్నీ ఈ మూవీకి గ్రీన్ సిగ్నల్ ఇచ్చాడు. దీని తర్వాతి చిత్రానికి కూడా బన్నీ పచ్చ జెండా ఊపినట్లు తాజా సమాచారం.
తమిళ స్టార్ డైరెక్టర్ మురుగదాస్‌తో అల్లు అర్జున్ జత కట్టబోతున్న సంగతి తెలిసిందే. స్పైడర్, సర్కార్ దర్బార్ చిత్రాలతో చేదు అనుభవం ఎదుర్కొన్న మురుగదాస్‌కు కోలీవుడ్లో ఆశించిన అవకాశాలు లేవు. విజయ్‌తో అనుకున్న సినిమా అనూహ్యంగా క్యాన్సిల్ అయింది. తర్వాత మరే పెద్ద స్టార్ మురుగతో సినిమా చేయడానికి ముందుకు రాలేదు. ఈ స్థితిలో బన్నీ అతణ్ని నమ్మాడు. ఐతే స్క్రిప్టు విషయంలో మాత్రం బన్నీ అంత ఈజీగా ఓకే చెప్పడన్న సంగతి తెలిసిందే.
బన్నీ కోసం ఇంతకముందు మురుగదాస్ ఒకట్రెండు లైన్స్ చెప్పినా ఫలితం లేకపోయింది. చివరికి ఇప్పుడు ఐకాన్ స్టార్ కోసం మురుగదాస్ ఒక సైన్స్ ఫిక్షన్ కథను చెప్పాడట. ‘సెవన్త్ సెన్స్’ తరహా కథ ఇదని.. ఐతే దానికంటే మెరుగ్గా స్క్రిప్టు రెడీ అవుతోందని.. లైన్ విని బన్నీ ఓకే చెప్పాడని.. ప్రస్తుతం పూర్తి స్థాయిలో స్క్రిప్టు సిద్ధం చేసే పనిలో మురుగదాస్ ఉన్నాడని.. ఇంకో ఏడాది తర్వాత ఈ సినిమా పట్టాలెక్కతుందని.. ఇది పాన్ ఇండియా సినిమా అని అంటున్నారు.
