అనూ ఇమ్మాన్యుయేల్ తెలుగు తెరకి పరిచయమై చాలా కాలమే అయింది. ఆమె కళ్లు..నవ్వు ప్రత్యేకమైన ఆకర్షణ అని చెప్పాలి. ఇండస్ట్రీలో అడుగుపెట్టిన తరువాత చాలా వేగంగా పవన్ కల్యాణ్ .. బన్నీ సరసన నటించే స్థాయి వరకూ వెళ్లింది. దురదృష్టం కొద్దీ ఆ స్టార్ హీరోలతో చేసిన సినిమాలు రెండూ ఫ్లాప్ అయ్యాయి. దాంతో సహజంగానే ఆమె మిగతా హీరోయిన్స్ కంటే వెనుకబడిపోయింది. అలాంటి అనూ ఇమ్మాన్యుయేల్ కి ‘ఊర్వశివో రాక్షసివో’ సినిమా కలిసొచ్చింది. ఈ సినిమా హిట్ ఆమెకి ఊరటనిచ్చింది. దాంతో టాలీవుడ్ మేకర్స్ కొందరు ఆమె డేట్స్ కోసం సంప్రదిస్తున్నట్టుగా తెలుస్తోంది.
ఈ నేపథ్యంలోనే ఆమె కార్తి సినిమా చేయడానికి అంగీకరించడం విశేషం. డ్రీమ్ వారియర్ పిక్చర్స్ వారు నిర్మిస్తున్న ఈ సినిమాకి, ‘జపాన్’ అనే టైటిల్ ను ఖరారు చేశారు. ఈ రోజునే ఈ సినిమా పూజా కార్యక్రమాలను జరుపుకుంది. రాజు మురుగన్ దర్శకత్వం వహిస్తున్న ఈ సినిమాకి జీవీ ప్రకాశ్ కుమార్ సంగీతాన్ని సమకూర్చుతున్నాడు. కెరియర్ పరంగా కార్తికి ఇది 25వ సినిమా. ‘సర్దార్’ హిట్ తరువాత కార్తి చేస్తున్న సినిమా కావడంతో సహజంగానే అంచనాలు భారీగా ఉన్నాయి. ఈ సినిమాలో సునీల్ ఒక ముఖ్యమైన పాత్రను పోషిస్తుండటం విశేషం..!!
