ఒక హీరోయిన్, ఒకే హీరోతో వరుస సినిమాలు చేయడం కొత్తేమీ కాదు. గతంలో చాలామంది హీరోయిన్లు ఇలా చేశారు కూడా. అయితే ఓ సినిమా సెట్స్ మీద ఉండగానే.. అదే కాంబినేషన్లో మరో సినిమా సెట్ అవ్వడం అంటే పెద్ద విషయమే. ఇప్పుడు అదే జరుగుతోంది బాలీవుడ్లో. ఆ హీరోయిన్ శ్రీలీల అయితే, ఆ హీరో కార్తిక్ ఆర్యన్. బాలీవుడ్లో మోస్ట్ ప్రామిసింగ్ హీరోగా పేరు గాంచిన కార్తిక్ ఆర్యన్ – శ్రీలీల ఇప్పుడు ఓ సినిమా చేస్తున్నారు. ‘ఆషికీ’ స్టైల్ కథతో ఈ సినిమా తెరకెక్కుతోంది అని సమాచారం..
అనురాగ్ బసు దర్శకత్వంలో రూపొందుతున్న ఆ సినిమానే ‘తు మేరి జిందగీ హై’. ఈ ఏడాది ప్రథమార్ధంలో ఈ సినిమా విడుదల కానుంది. ఇప్పుడు అదే కాంబినేషన్లో మరో సినిమాకు సర్వం సిద్ధమైందంటున్నారు. ‘చందు ఛాంపియన్’ సినిమా దర్శకుడు కబీర్ ఖాన్తో కార్తిక్ ఓ సినిమా చేయనున్నారు అని వార్తలొస్తున్నాయి. త్వరలోనే అధికారికంగా ఈ సినిమా ప్రకటిస్తారు అని కూడా అంటున్నారు. ఆ సినిమాలో కథానాయికగా శ్రీలీలను ఎంపిక చేశారని సమాచారం. స్పోర్ట్స్ డ్రామా నేపథ్యంలో రూపొందనున్న కబీర్ ఖాన్ సినిమాలో కార్తిక్ కిక్ బాక్సింగ్ కోచ్ పాత్రలో కనిపిస్తాడట…!!
