బుల్లితెర ప్రేక్ష‌కుల‌ని ఎంత‌గానో అల‌రిస్తున్న బిగ్ రియాలిటీ షో బిగ్ బాస్ కార్య‌క్ర‌మం సెప్టెంబ‌ర్‌లో మొద‌లు కానున్న‌ట్టు తెలుస్తుండ‌గా, ప్ర‌స్తుతం ఈ షోకి సంబంధించిన ఏర్పాట్లు శ‌ర‌వేగంగా సాగుతున్నాయి. ఇప్ప‌టికే ప్రోమో ద్వారా సీజన్5కి కూడా నాగార్జున‌నే హోస్ట్ అని క‌న్‌ఫాం చేశారు.ఇక ఇందులో పాల్గొనబోయే కంటెస్టెంట్స్ విష‌యంలోనే కొంత క‌న్ఫ్యూజ‌న్ ఉంది. ఇప్ప‌టికే కంటెస్టెంట్స్‌కి సంబంధించిన ఇంట‌ర్వ్యూ పూర్తి కాగా, వారంద‌రు ఈ సారి త‌మ ఇంట్లోనే క్వారంటైన్‌లో ఉండి ఆ త‌ర్వాత బిగ్ బాస్ హౌజ్‌లోకి అడుగుపెట్ట‌నున్నారట. బిగ్ బాస్ సీజన్ 5లో పాల్గొనబోయే ఫైన‌ల్ కంటెస్టెంట్ లిస్ట్ ఇదేనంటూ కొంద‌రి పేర్లు చ‌క్క‌ర్లు కొడుతున్నాయి.
కొత్త జాబితాలో యాంకర్‌ రవి, ఆర్‌జే కాజల్‌, శ్వేతా వర్మ, లహరి షారి, కమెడియన్‌ లోబో, సిరి హన్మంతు, నటి ప్రియ, కార్తీకదీపం ఉమాదేవి, 7 ఆర్ట్స్‌ సరయు, నటుడు మానస్‌ షా, మోడల్‌ జస్వంత్‌, నటుడు సన్నీ, విశ్వ, టీవీ9 యాంకర్‌ ప్రత్యూష, ఆట సందీప్‌/రఘు మాస్టర్ల పేర్లు ఉన్నాయి. గ‌తంలో ప్ర‌చారం జ‌రిగిన లిస్ట్‌లో యాంకర్‌ వర్షిణీ, ట్రాన్స్‌జెండర్‌ ప్రియాంక, యూట్యూబ్‌ స్టార్‌ షణ్ముక్‌ జస్వంత్‌, అనీ మాస్టర్‌, యూట్యూబర్‌ నిఖిల్‌ల పేర్లు ఉండగా కొత్త లిస్ట్‌లో వారి పేర్లు లేక‌పోవ‌డం గ‌మన‌ర్హం. ‘బోర్‌డ‌మ్‌కు చెప్పేయ్ గుడ్‌బై.. వ‌చ్చేసింది బిగ్‌బాస్‌ తెలుగు సీజన్ 5’ అంటూ నిర్వాహ‌కులు షోపై ఆస‌క్తిని క‌లిగిస్తున్నారు.
