కాంబినేషన్ వింతగా అనిపించినప్పటికీ ఇది నిజం. చిరంజీవి-రవితేజ కాంబోలో రాబోతున్న ప్రాజెక్టులోకి ఇప్పుడు కొత్తగా క్యాథరీన్ త్రెసా వచ్చి చేరింది. మంచి క్రేజ్ కోసం ఎదురుచూస్తున్న ఈ ముద్దుగుమ్మకు నిజంగా ఇది చాలా పెద్ద అవకాశం. ఈ మూవీ క్లిక్ అయితే క్యాథరీన్ దశ తిరిగినట్టే. బాబి దర్శకత్వంలో ఓ సినిమా చేస్తున్నారు చిరంజీవి. ఇందులో హీరోయిన్ గా శృతిహాసన్ ను తీసుకున్నారు. ఓ కీలక పాత్ర కోసం రవితేజను తీసుకున్నారు. అతడికి హీరోయిన్ గా ఇప్పుడు క్యాథరీన్ ను తీసుకున్నారు. గ్లామర్ తో పాటు యాక్టింగ్ టాలెంట్ కూడా ఉండడంతో, క్యాథరీన్ ను ఈ అవకాశం ఈజీగా వరించింది.
నిజానికి ఈ ప్రాజెక్టులో రవితేజ సరసన నివేత పెతురాజ్ పేరు మొన్నటివరకు వినిపించింది. కానీ ఆఖరి నిమిషంలో ఆమె స్థానంలో క్యాథరీన్ వచ్చినట్టు తెలుస్తోంది. త్వరలోనే ఈ మేటర్ పై మైత్రీ మూవీ మేకర్స్ నుంచి అఫీషియల్ స్టేట్ మెంట్ రాబోతోందట. ఇద్దరమ్మాయిలతో, సరైనోడు, నేనే రాజు నేనే మంత్రి లాంటి సినిమాల్లో నటించింది క్యాథరీన్. ఆ తర్వాత ఆమెకు పెద్దగా పేరు రాలేదు. ప్రస్తుతం ‘బింబిసార’, ‘భళా తందనాన’, ‘మాచర్ల నియోజకవర్గం’ సినిమాల్లో నటిస్తోంది. చిరంజీవి సినిమాలో అవకాశం, క్యాథరీన్ కెరీర్ కు కలిసొచ్చేలా ఉంది.
