లెజెండ్, పండగజేస్కో, జన్నత్ లాంటి సినిమాలతో గుర్తింపు తెచ్చుకున్న హీరోయిన్ సోనాల్ చౌహాన్. తాజాగా ఈ ముద్దుగుమ్మ ప్రభాస్ చేస్తోన్న ఆదిపురుష్ చిత్రంలో నటించే అవకాశం కొట్టేసింది. ఈ విషయాన్ని ఆమె ఓ ఇంటర్వ్యూలో చెప్పింది.. “అవును నేను ఆదిపురుష్ చిత్రంలో నటిస్తున్నాను. ఇందుకోసం ఆత్రుతగా ఎదురుచూస్తున్నాను. ఇప్పటి వరకు నేను చేసిన సినిమాలకు పూర్తిగా ఇది విభిన్నమైన ప్రపంచం. సినిమా ప్రియులు ఈ భారీ చిత్రాన్ని చూసి కచ్చితంగా మెచ్చుకుంటారని అనుకుంటున్నాను.” అని సోనాల్ చౌహాన్ స్పష్టం చేసింది.
ఆదిపురుష్ చిత్రంలో ప్రభాస్ సరసన కృతిసనన్ లీడ్ రోల్ పోషిస్తున్నారు. సైఫ్ అలీ ఖాన్ ప్రతినాయకుడిగా నటిస్తున్నారు. బాలీవుడ్ దర్శకుడు ఓం రౌత్ ఈ చిత్రానికి దర్శకత్వం వహిస్తున్నారు. ఈ పౌరాణిక చిత్రాన్ని అత్యంత భారీ బడ్జెట్‌తో తెరకెక్కిస్తున్నారు. వచ్చే ఏడాది ఈ సినిమాకు ప్రేక్షకుల ముందుకు తీసుకురావాలని చిత్రబృందం ప్రణాళికలు సిద్ధం చేసింది. తెలుగు, హిందీతో పాటు ఇతర భాషల్లోనూ ఈ సినిమాను విడుదల చేయనున్నారు.
